தமிழ்நாட்டில் கொரானா வைரஸ் பரவாமல் தடுக்க தனிமைப்படுத்துதல் என்ற முறையினை தீவிரப்படுத்துவதல் குறித்து அளித்த விளக்கம்.

மாண்புமிகு தமிழ்நாடு முதலமைச்சர் திரு எடப்பாடி கே.பழனிசாமி அவர்கள் இன்று (22.03.20) சட்டப்பேரவையில் தமிழ்நாட்டில் கொரானா வைரஸ் பரவாமல் தடுக்க தனிமைப்படுத்துதல் என்ற முறையினை தீவிரப்படுத்துவதல் குறித்து அளித்த விளக்கம்.

மாண்புமிகு பேரவைத் தலைவர் அவர்களே,

கொரானா வைரஸ் நோய்த் தொற்றை தடுக்க மாண்புமிகு அம்மாவின் அரசு தொடர்ந்து தீவிர பாதுகாப்பு நடவடிக்கைகளை போர்க்கால அடிப்படையில் மேற்கொண்டு வருகிறது. இந்தியாவில் கொரானா வைரஸ் நோயால் பாதிக்கப்பட்ட நபர்கள் உள்ள 75 மாவட்டங்களில் தீவிர நோய் கண்காணிப்பு மற்றும் தடுப்பு நடவடிக்கைகளை மேற்கொள்ளும் வகையில் சில வழிமுறைகளை மத்திய அரசு பரிந்துரைத்துள்ளது. தனிமைப்படுத்துதல் என்ற முறையை தீவிரப்படுத்த நோய் பாதித்த நபர்கள் உள்ள மாவட்டங்களில் சில கடுமையான நடவடிக்கைகளை தற்போது மேற்கொள்வது அவசியமாகிறது. இதனை கருத்தில் கொண்டு கீழ்க்கண்ட முடிவுகளை இந்தப் பேரவையின் வாயிலாக வெளியிட விரும்புகிறேன். மத்திய அரசால் கொரானா வைரஸ் நோயால் பாதிக்கப்பட்ட நபர்கள் உள்ள மாவட்டங்களான சென்னை காஞ்சிபுரம் ஈரோடு உள்ளிட்ட தமிழ்நாட்டின் அனைத்து மாவட்டங்களிலும் போக்குவரத்து மற்றும் பொதுமக்களின் நடவடிக்கைகளை கட்டுப்படுத்த தொற்றுநோய் சட்டம் 1897ல் விரத்து 2ன்படி மாவட்ட எல்லைகளை மூட உத்தரவிடப்படுகிறது. இதற்கான விரிவான அறிக்கை இன்று மாலை வெளியிடப்பட்டது. இந்த உத்தரவு நாளை மாலை 6 மணி முதல் தொடங்கி 31.3.20. வரை நடைமுறையில் இருக்கும்.

இந்த அறிக்கையை தீவிரமாக அமல்படுத்த அனைத்து காவல் ஆணையர்களும், மாவட்ட ஆட்சித் தலைவர்களும் குற்றவியல் நடைமுறைச் சட்டப் பிரிவு 144 கீழ் உரிய உத்தரவுகளை பிறப்பிக்க வேண்டும்.

இந்த உத்திரவின்படி கீழ்கண்ட கட்டுப்பாடுகள் விதிக்கப்படுகின்றன:

  1. அத்தியாவசிய மற்றும் அவசியப் பணிகள் தவர மற்ற பொதுப் போக்குவரத்து, தனியார் போக்குவரத்து, ஆட்டோ, டாக்சி போன்றவை இயங்காது. மாநிலங்களுக்கு இடையேயும் மாவட்டங்களுக்கு இடையேயான போக்குவரத்து அத்தியாவசிய இயக்கத்திற்கு தவிர மற்ற இயக்கம் முற்றிலும் தடை செய்யப்படுகிறது.
  2. அத்தியாவசிய பொருட்களான பால், காய்கறி, மளிகை, இறைச்சி, மீன் கடைகள் போன்றவை தவிர அனைத்து கடைகளும் வணிக வளாகங்களும் பணிகளும் இயங்காது.
  3. அத்தியாவசிய துறைகள் மற்றும் அலுவலக பணிகள் தவிர மற்ற அரசு அலுவலகங்கள் செயல்படாது. அத்தியாவசிய பணிகளை மேற்கொள்ளும் அரசு துறைகளான மாவட்ட நிர்வாகம், காவல்துறை, தீயணைப்பு மற்றும் மீட்புப் பணித் துறை, சிறைத்துறை, பொது சுகாதாரம் மற்றும் மருத்துவத்துறை, நீதிமன்றங்கள், உள்ளாட்சி அமைப்புகள் போன்றவை தொடர்ந்து இயங்கும். எனினும் தனிநபர் சுகாதாரம் நடவடிக்கை உட்பட அனைத்து நோய் தடுப்பு முன்னெச்சரிக்கை நடவடிக்கைகளும் அலுவலகத்தில் பின்பற்ற வேண்டும்.
  4. தனியார் நிறுவனங்கள் தகவல் தொழில்நுட்பம் மற்றும் உயிர் தொழில்நுட்ப துறை அலுவலக பணியாளர்கள் வீட்டிலிருந்தே வேலை செய்ய வேண்டும். எனினும் அத்தியாவசிய பணிகளையும் மருத்துவம் உள்ளிட்ட பணிகளையும் மேற்கொள்ளும் தனியார் நிறுவனங்கள் மற்றும் மருத்துவமனைகள் தொடர்ந்து இயங்கும்.
  5. அத்தியாவசியமான பொருட்களை தயாரிக்கும் தொழிற்சாலைகள் மற்றும் ஏற்றுமதி நிறுவனங்கள் குறைந்த பணியாளர்களுடன் இயங்க அனுமதிக்கப்படுகிறது.
  6. அத்தியாவசிய கட்டிடப் பணிகள் தவிர பிற கட்டிடப் பணிகளுக்கு தடை விதிக்கப்படுகிறது. எனினும் இந்த நாட்களில் வேலைக்கு வராத தொழிலாளர்களுக்கு சம்பளம் நிறுத்தம் செய்யக் கூடாது.
  7. வீடுகள் இல்லாமல் வீடு விடுதிகள் மற்றும் பிற இடங்களில் தங்கி இருக்கும் பல்லாயிரக்கணக்கான பணியாளர்களின் நலன் கருதி பார்சல் மூலம் மட்டும் உணவு வழங்கும் வகையில் உணவகங்கள் திருப்ப அனுமதிக்கப்படும். அம்மா உணவகங்கள் வழக்கம்போல செயல்படும்.

வெளிநாடுகளில் இருந்து வந்துள்ள நபர்கள் சுயமாகவே தங்களை தனிமைப்படுத்திக் கொண்டு, நோய் அடிக்கடி வருகிறதா என கண்காணித்து அரசு மருத்துவமனைகள் மூலமோ அனுமதிக்கப்பட்ட தனியார் மருத்துவமனைகள் மூலம் மருத்துவ பரிசோதனைகளை மேற்கொண்டு நோய் பாதிப்பு உறுதியானால் உரிய மருத்துவ சிகிச்சை எடுத்துக்கொள்ள வேண்டும். என்றும் அதற்கு குடும்ப உறுப்பினர்கள் நோய்த்தொற்று ஏற்படாத வண்ணம் செயல்பட வேண்டுமென்று கேட்டுக் கொள்ளப்படுகிறார்கள். இதுபோன்ற நடவடிக்கையை இந்தக் கடுமையான தொற்றுநோய் மற்ற குடும்ப உறுப்பினர்களுக்கும் மற்றவர்களுக்கு பரவாமல் தடுக்க பேருதவியாக இருக்கும் என்பதை நாம் அனைவரும் உணர வேண்டும்.

வெளிநாடு சென்று திரும்பிய நபர்களுடன் நேரடித் தொடர்பு இல்லை என்றாலும் இன் நோய்த்தொற்றின் கடமையை உணர்ந்து நோய்த்தொற்று ஏற்பட்டிருக்க வாய்ப்பு உள்ளதை மனதில் கொண்டு இந்த நோய்க்கான அறிகுறி உள்ளவர்கள் உடனடியாக அரசு மருத்துவமனை அல்லது அனுமதிக்கப்பட்ட தனியார் மருத்துவமனைகள் மூலமோ மருத்துவ பரிசோதனை செய்து கொள்ளவும் அறிவுறுத்தப்படுகிறார்கள்.

தடை உத்தரவால் கர்ப்பிணி பெண்கள் முதியோர் ஆகியோருக்கு ஏற்படும் இடையூறுகளை அறிந்து அவற்றைத் தடுக்க உரிய நடவடிக்கை எடுக்க மாவட்ட ஆட்சித்தலைவர்கள் அறிவுறுத்தப்படுகிறார்கள்.

இத்தடை காலத்தில் அத்தியாவசியமான பொருட்களான உணவுப் பொருட்கள் மருத்துவப் பொருட்கள் போன்றவற்றின் போக்குவரத்துக்கும் விற்பனைக்கும் யாதொரு தடையும் இல்லை.

நோய்த்தடுப்பு நடவடிக்கைகளால் பாதிக்கப்பட்ட குடும்பங்களுக்கு நிவாரணம் வழங்குவது பற்றி மாண்புமிகு அம்மாவின் அரசு பரிசீலித்து வருகிறது. இதற்கான ஆணைகள் தனியே வெளியிடப்படும்.

கொரானா தொற்று நோய் பரவுவதை தடுக்க இந்த அரசு எடுத்து வரும் கடுமையான நடவடிக்கைகளுக்கு பொதுமக்கள் முழு ஒத்துழைப்பு நல்க வேண்டும் எனக் கேட்டுக்கொள்கின்றேன்.